Radiosendung «Zum neuen Tag» von Karl Imfeld (1932-2020) vom 24.10.1995 für Radio DRS.
Transkript:
Wältsch Zwätschgä
Grad under myner Garasch stahd ä gwiss hundertjährigä Zwätschgäbaim. Är isch kei Gartäziär. Vormenä Jahr hedem der Sturm juscht der gresser Ascht abgchlepft, wonem nu d Form vomenä Baim ggà hätt. Etz macht er vom Stamm obsidruis nur nu à Gattig wiänä Vogel, wo mit eim Fäckä wett vom Bodä uifflygä. Letschti bini miderä Frai a däm Baim verby. Da, undereinisch seid sy: „Mh hiä schmeckts so guäd vo Zwätschgä.“ Das heds tatsächlich ai. Der Ascht isch ghanget voll vo ubergrossä, wältschä Zwätschgà, wiä mä nä hiä seid. Wenn sy ryf sind, sind sy zuckersiäss und weich, das mä sy cha uissuigä. As par Mitarbeiter und bsunders iri Chind wartid allimal druif, das es fir jedi Part ä scheenä Chesssel vollä gid. Und glych, diä Zwätschgä chenid nu so guäd sy, mä chennt keis Pfund dervo amenä Händler verchaiffä. Sy entsprächid a dà hitigä Konsumäntä-Asprich nid. Sy hend oni, dass sy miänd gspritzt wärdä, à fläckälosi, fyni Huid wiänes Reklamägsicht vonerä Kosmetikfirma. Sy uberträffid jedes Plantaschäprodukt a Gressi, Siässigkeit und Gschmack, aber – sy laad nid vom Stei. Das isch es. I hundert Jahrä hed dä Baim nid glehrd, wià à hitigi Zwätschgä muäs sy, das mä sy oni d Finger z verschmirä sell chennä uissteinä oder als Desserfrucht ufà Tisch bringä. Dä arm, gstrupiärtnig Zwätschgäbaim isch hundertjährig. Ai scho hend mer ander Lyt, wo nid wissid, was mid im los sich, gseid, är syg ja nymä wäärd und machi kei Staat. Ich sett ä laa umtuä und äs gäb hit sogar ertragrycheri Edelsortä. Hundert Jahr hed dä Baim jedä Herbscht im Durchschnid viär bis fyf grossi Chessel voll Zwätschgä treid. Und etz, won är anes par Generationä Freid und Nahrig ggä hed, sett är nymä wäärd sy, nur wil är alt und unschynbar wordä isch? Der Wäärd vo jedem Baim erkennd mä a synä Fricht. Ä guäti Frucht, cha nid vomenä schlächtä Baim cho und ä guäti Sach nid vomenä schlächtä Mäntsch.
Als Ortsbezug wurde das Pfarrhaus gewählt.