Radiosendung «Zum neuen Tag» von Karl Imfeld (1932-2020) vom 28.10.1995 für Radio DRS.
Transkript:
Ros-cheschtenä
Um d Jahrhundertwändi isch ä Her us Italiä zu ys cho. D Lyt hend vonem verzelld, är syg ä Baron. Är hed ufemanä Hoger mit scheener Uissicht ä Villa buiwä und drumumä ä Park mid allerlei sältenä Bäimä gmacht, än änglischä Gartä hed mä däm gseid. Ei Baim, unnä bi der Zuäfahrt, isch, bsunders guäd graatä, ä Roscheschtenäbaim. Das syg doch nyd Bsunderigs, dänkid Sy vileicht. Wyt gfähld. Das isch nid sonä zämägstutzä Stadt- oder Parkbaim, wiä sy d Stadarbeiter im Friälig z hundertä mid der Baimsagi und der Schäri traktiärid, dass sy nid i d Trolibusleitig uifäwachsid oder d Ubersicht verspeerid. Äs isch ehnder as nid ä zwänzg Meter heechä Baim midmenä wytä, vollnä Aschtwärch. D Villa mag uber d Jahr im Verglych zum hittigä Komfort bescheidä wordä sy. Der friäner Chiswäg isch hit gasfaltiärd. Der Park isch äs Stuck Natuir und diä exotisachä Bäim sind ä Sortä Verwandtnigi vom Wald wordä, wo grad hinnadra afaad Nur einä hed eppis vo syner friänerä Härkumft bewahrd, der Roscheschtenäbaim, dunnä zwischetem Bächli und der Strass. Im Friälig leid är miderä unbeschryblichä Eleganz syni Bletter usänand, schiär wiäni Damä, wenn sy d Glasseehändschä abziäd. Dernah macht är sich miderä Bliätäpracht zwäg as obs zumenä Galauiftrid giäng. Zletschtämand blybt är aber [glych] wider da, won är sit bald hundert Jahrä stahd und gid amenä Bitz gwehndlichä, gmähtä Buirämättäli d Eleganz vomenä Park. Und glych. Im Herbscht, wenn är diä scheenä, glänzigä Cheschtenä laad la ghya, dunkts mi, är syg doch ä Cheschtenäbaim wiänä anderä. Chind und grossi Lyt chemid und läsid d Cheschtenä uif, drähjid sy i der Hand und gniässid ds Gspir vo irer fynä, glattä Hiltschä. Mängisch wär ich ai gäärä ächly wiä dä Baim. Wett im Herbscht gäärä ä Frucht ha, wo mä nid unbedingt muäs chennä ässä und wo trotzdäm epperem Freid macht.
Als Ortsbezug wird das Pfarrhaus gewählt.