Radiosendung «Zum neuen Tag» von Karl Imfeld (1932-2020) vom 28.10.1995 für Radio DRS.
Transkript:
Der Kenig vo da Bäimä
Einisch hend d Bäim abgmacht, sy wellid ä Kenig wehlä. Sy hend zum Eelbaim gseid: Chum, bis dui ysä Kenig. Der Eelbaim hed sich gwehrd: Ich cha doch nid mys Eel uifgä, wo a Getter und Mäntschä zur Ehr pruicht wird und a dä anderä Bäimä zuäwinkä. D Bäim hend am Fygäbaim gseid: Chum bis dui halt ysä Kenig. Der Fygäbaim hed sich gwehrd: Ich cha doch nid myni siässä Fygä uifgä und a dä anderä Baimä zuäwinkä. D Bäim hend am Wystock gseid: So bis halt dui ysä Kenig. Der Wystock hed sich druisgredt: Ich cha etz dänk my Wy uifgä, wo God und Mäntschä iri Freid dra hend und a d anderà Bäimà zuzäwinkä. D Bäim hend zum Dornpusch gseid: Bis dui ysä Kenig. Der Dornpusch hed zu dä Bäimä gseid: Wend iär mich wirklich zu ywem Kenig machä? Guäd, chemid, iär sellid bi miär im Schutz und sicher sy. Mà chent meinä, dià Fabel vo dä Bäim und irem Kenig syg a der Generalversammlig vomenä Verein entstandä. Sy wissid scho: A dä Besserbeschäftigtä chas und wills nid passä. Was miäch d Wäld, wenn sy einisch fir anderi ä Diänscht ubernähmid, wo nid das uishalted, wo inä standesgemäss zuästahd? Sälbverstäntlich sind sy sofort da, wo iri Diänscht, sägid mer einisch gschäftlich, gfragt sind. Sy winkid dä anderä gäärä zuä, wenn wiä bimenä Umzug derfir ä Bluämästruiss z flygä chund. Ehrlich gseid, a dà Dornpisch truiweni ai nid a allnä. Wiä mängä schabed sich d Stachel ab, wenn er gmerkt, das amenä Ord äs Kenigspeschtli fry wird. Da drähti ich bi Klub und Verein, bi Chilä oder Staat kei Hand um. Wenn mä richig luägt, sind diä aber guäd z erkennä. Dert wo sy d Dern äwäggmacht hend, sind sy bsunders chläberig. Glicklich diä, wo än ehrlichä Dornpusch gwehld hend. Är wehrd allerlei ab und mä isch sälber sicher, solang as män im nid z nooch chund und im nid der Schmuis will macha. Wisstid Sy nu gäärä, won ich diä aktuell Gschicht härä ha? Sy isch guäd dry tuisig jährig und stahd i der Bibel, im Buäch vo dä Richter.
Als Ortsbezug wird das Wohnhaus Imfelds gewählt.